KOMANDI DYSTIR


EFFODEILDIN
5. pláss

 
 

 


Stuðlar







Málveitsla í hálvfinaluni hjá U16 dreingjum

Dreingir20-06-2013 - Jónfinn Petursson

U16 dreingir, steypakappingin, hálvfinala: HB - EB/Streymur 6-4

Tað gjørdist ein sera málríkur dystur millum U16 dreingirnar hjá HB og EB/Streymi mikukvøldið. Ikki færri enn 10 ferðirnar endaði bólturin í meskunum umframt tvær reisur, tá málini vóru kolldømd fyri rangstøðu.


Eftir fyrstu løtuna ímyndaðu vit okkum, at HB fór at vinna stórt. Hilmar Leon Jacobsen sendi eitt vælplaserað langskot upp í høgra horn, og løtu seinni økti Jákup L. Thomsen til 2-0.

Men brádliga vaknaðu gestirnir úr Sundalagnum og fingu tvey skjót og væl gjøgnumspæld mál, og so var javnleikur aftur.

HB fær síðani brotsspark, og Jákup L. Thomsen skorar til 3-2. Hinumegin var okkara málmaður óheppin, tá bólturin glapp honum av hondum. Framherji hjá EB-Streymi er kvikur við fótinum og fær javnað til 3-3.

HB kemur framum aftur, tá Jákup L. Thomsen hegnisliga høvdar eina góða avlevering frá vinstru inn í meskarnar.

Løtu seinni varð næstan javnað hinumegin, men Jónas Poulsen er knappur og kemur ímillum í evstu løtu og fær sparkað burtur.

Síðani vísti Jákup L. Thomsen tvær ferðir afturat, at hann er í serklassa sum áleypari og skoraði til 5 og 6-3.

Nú var sloppið, men áðrenn Erling Eysturoy bríkslaði dystin av, megnaði EB-Streymur við beinleiðis frísparki at minka um munin til 6-4.

Venjarin, Jón Simonsen, var eyðvitað sera stoltur av U16 dreingjunum, sum nú eru komnir í steypafinaluna.

Ikki mugu vit heldur gloyma høvuðsungdómsvenjara okkara, Milan Cimburovic, ið nú hevur fingið bæði U14 og U16 liðini í steypafinaluna.

Vit fegnast almikið og ynskja venjarum, dreingjunum og øllum avvarandi hjartaliga til lukku við avrikinum.